lie detector

பொய் சொல்வதென்பது குற்றவுணர்வோடு சம்பந்தப்பட்டதால், அது தன்னாட்சி நரம்பு மண்டலத்தைத் தூண்டி, இதயத் துடிப்பு, இரத்த அழுத்தம், சுவாசம், தோலின் ஈரப்பதம் போன்றவற்றைப் பாதிக்கின்றது. இதில் ஏற்படும் மாற்றங்களை, கருவிகளைக் கொண்டு அளவிடுவதன் மூலம் விசாரணைக்குட்பட்ட ஒருவர் பொய் சொல்லுகிறாரா அல்லது உண்மை சொல்லுகிறாரா என்பதை அறிய முடியும் என்ற அனுமானத்தின் பேரில், காவல் துறையும், பிற விசாரணை அமைப்புகளும் பொய்யறி கருவிகளைப் பயன்படுத்துகின்றனர். இதிலிருந்து பெறப்பட்ட முடிவுகள் நீதிமன்றத்தால் ஏற்றுக்கொள்ளப்படாவிட்டாலும் கூட, விசாரணை அமைப்புகளுக்கு குற்றவாளிகளின் பதிலைக்கொண்டு எத்திசையில் மேற்கொண்டு விசாரணையை நடத்தவேண்டும், எந்தெந்தக் கோணங்களில் விசாரணையை மேற்கொள்ளவேண்டும் என்பதை அறிய உதவுவதால், பொய் நிரூபமானி அல்லது பொய்யறி கருவிகளைப் பரவலாகப் பயன்படுத்துகின்றனர்.